IPL 2021: ಈತನನ್ನು ಖರೀದಿಸಲು ಐಪಿಎಲ್​ ಫ್ರಾಂಚೈಸಿಗಳು ಪೈಪೋಟಿ ನಡೆಸಲಿದೆ..!

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್ 13 ಮುಕ್ತಾಯವಾಗಿದೆ. ಇನ್ನೇನು, ಕೆಲವೇ ತಿಂಗಳಲ್ಲಿ ಮತ್ತೆ ಸೀಸನ್ 14 ಶುರುವಾಗಲಿದೆ. ಈಗಾಗಲೇ ಇದಕ್ಕೆ ಬೇಕಾದ ಸಿದ್ಧತೆಗಳನ್ನು ಬಿಸಿಸಿಐ ಶುರು ಮಾಡಿಕೊಂಡಿದೆ.

ಇದೇ ಡಿಸೆಂಬರ್ 24 ರಂದು ಬಿಸಿಸಿಐ ವಾರ್ಷಿಕ ಮಹಾಸಭೆ ನಡೆಯಲಿದ್ದು, ಅಂದು ಐಪಿಎಲ್​ನಲ್ಲಿ ಹೊಸ ಎರಡು ತಂಡಗಳನ್ನು ಸೇರ್ಪಡೆಗೊಳಿಸುವ ಬಗ್ಗೆ ಅಂತಿಮ ತೀರ್ಮಾನವಾಗಲಿದೆ. ಅಲ್ಲದೆ ಇದರ ಬೆನ್ನಲ್ಲೇ ಮೆಗಾ ಹರಾಜಿನ ದಿನಾಂಕಗಳು ಕೂಡ ಪ್ರಕಟವಾಗುವ ಸಾಧ್ಯತೆಯಿದೆ.

ಈ ಬಾರಿ ಮೆಗಾ ಹರಾಜು ನಡೆಯುವುದರಿಂದ ಪ್ರತಿಯೊಂದು ತಂಡಗಳು 3 ಆಟಗಾರರನ್ನು ಹೊರತುಪಡಿಸಿ ಉಳಿದ ಪ್ಲೇಯರ್ಸ್​ಗಳನ್ನು ಬಿಡುಗಡೆ ಮಾಡಬೇಕು. ಹೀಗಾಗಿ ಬಹುತೇಕ ಆಟಗಾರರು ಇತರೆ ಫ್ರಾಂಚೈಸಿಗಳಿಗೆ ಬಿಡ್ಡಿಂಗ್​ಗೆ ಲಭಿಸಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರನ ಖರೀದಿ ಮೇಲೆ ಎಲ್ಲಾ ಫ್ರಾಂಚೈಸಿಗಳ ಕಣ್ಣಿರಲಿದೆ ಎಂದಿದ್ದಾರೆ ಇಂಗ್ಲೆಂಡ್ ಕ್ರಿಕೆಟ್ ತಂಡದ ಮಾಜಿ ನಾಯಕ ಮೈಕೆಲ್ ವಾನ್.

ಹೌದು, ಮೈಕೆಲ್ ವಾನ್ ಪ್ರಕಾರ, ಮುಂದಿನ ಸೀಸನ್​ನಲ್ಲಿ ಎಲ್ಲಾ ಫ್ರಾಂಚೈಸಿಗಳು ಗ್ಲೆನ್ ಮ್ಯಾಕ್ಸ್​ವೆಲ್ ಖರೀದಿಗೆ ಆಸಕ್ತಿವಹಿಸಲಿದ್ದಾರೆ. ಭಾರತದ ವಿರುದ್ಧದ ಏಕದಿನ ಸರಣಿಯಲ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿರುವ ಮ್ಯಾಕ್ಸಿಯನ್ನು ತಂಡಕ್ಕೆ ಸೇರ್ಪಡೆಗೊಳಿಸಲು ಮುಂದಿನ ಐಪಿಎಲ್​ ಸೀಸನ್​ನಲ್ಲೂ ಉತ್ತಮ ಪೈಪೋಟಿ ನಡೆಯಲಿದೆ ಎಂದಿದ್ದಾರೆ.

ಯುಎಇ ನಲ್ಲಿ ನಡೆದ ಐಪಿಎಲ್​ನ ಪ್ರದರ್ಶನವನ್ನು ನೀವು ಗಣನೆಗೆ ತೆಗೆದುಕೊಳ್ಳಬೇಡಿ. ಮ್ಯಾಕ್ಸ್​ವೆಲ್ ಭಾರತದ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ 19 ಎಸೆತಗಳಲ್ಲಿ 45, ಎರಡನೇ ಪಂದ್ಯದಲ್ಲಿ 29 ಎಸೆತಗಳಲ್ಲಿ 69 ಹಾಗೂ 3ನೇ ಪಂದ್ಯದಲ್ಲಿ 38 ಎಸೆತಗಳಲ್ಲಿ 59 ರನ್ ಸಿಡಿಸಿದ್ದಾರೆ.

ಸದ್ಯ ಮ್ಯಾಕ್ಸ್​ವೆಲ್ ಅದ್ಭುತ ಫಾರ್ಮ್​ನಲ್ಲಿದ್ದಾರೆ. ಹೀಗಾಗಿ ಮುಂದಿನ ಐಪಿಎಲ್​ ಹರಾಜಿನಲ್ಲಿ ಅವರು ಬಹುಬೇಡಿಕೆಯ ಆಟಗಾರರಾಗಿರುತ್ತಾರೆ ಎಂದು ಮೈಕೆಲ್ ವಾನ್ ತಿಳಿಸಿದರು.

7ನೇ ಕ್ರಮಾಂಕದಲ್ಲಿ ಅತ್ಯುತ್ತಮವಾಗಿ ಮ್ಯಾಕ್ಸ್​ವೆಲ್ ಬ್ಯಾಟ್ ಬೀಸುತ್ತಿದ್ದಾರೆ. ಅಷ್ಟೇ ಅಲ್ಲದೆ ಅದ್ಭುತ ಫೀಲ್ಡರ್ ಕೂಡ. ತಮ್ಮ ಕ್ಷೇತ್ರರಕ್ಷಣೆಯ ಮೂಲಕ ತಂಡಕ್ಕೆ 5 ರಿಂದ 10 ರನ್​ ಉಳಿಸಿಕೊಡುತ್ತಾರೆ. ಹೀಗಾಗಿ ಆತನನ್ನು ಖರೀದಿಸಲು ಎಲ್ಲಾ ಫ್ರಾಂಚೈಸಿಗಳು ಹೆಚ್ಚಿನ ಆಸಕ್ತಿ ತೋರಿಸಲಿದೆ ಎಂದು ಮೈಕೆಲ್ ವಾನ್ ತಿಳಿಸಿದರು.

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್​ 13ನಲ್ಲಿ ಮ್ಯಾಕ್ಸ್​ವೆಲ್ ಅತ್ಯಂತ ಕಳಪೆ ಪ್ರದರ್ಶನ ನೀಡಿದ್ದರು. ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ 13 ಪಂದ್ಯಗಳನ್ನಾಡಿದ ಮ್ಯಾಕ್ಸಿ ಗಳಿಸಿದ್ದು ಕೇವಲ 108 ರನ್​ಗಳು ಮಾತ್ರ. ಅದಕ್ಕಿಂತಲೂ ವಿಚಿತ್ರ ಎಂದರೆ ಈ ಬಾರಿಯ ಐಪಿಎಲ್​ನಲ್ಲಿ ಮ್ಯಾಕ್ಸ್​ವೆಲ್ ಬ್ಯಾಟ್​ನಿಂದ ಒಂದೇ ಒಂದು ಸಿಕ್ಸ್ ಸಿಡಿದಿರಲಿಲ್ಲ. ಇನ್ನು ಬೌಂಡರಿ ರೂಪದಲ್ಲಿ 9 ಫೋರ್ ಬಾರಿಸಿರುವುದೇ ಸಾಧನೆ.